दिगो यातायात रणनीति तर्जुमा गरिने

काठमाडौँ, मङ्सिर ४ गते । उपप्रधानमन्त्री एवम् भौतिक पूर्वाधार तथा यातायातमन्त्री विजयकुमार गच्छदारले दिगो राष्ट्रिय यातायात रणनीति तर्जुमा गरिने बताउनुभएको छ ।

नेपाल सरकार, क्षेत्रीय विकासका लागि राष्ट्रसङ्घीय केन्द्र, एसिया तथा प्रशान्त क्षेत्रका लागि राष्ट्रसङ्घीय आर्थिक तथा सामाजिक आयोग (इस्क्याप) र जापानको वातावरण मन्त्रालयले संयुक्तरुपमा राजधानीमा आयोजना गरेको चारदिने ‘वातावरणीय रुपमा एसियामा दिगो यातायात मञ्च’ को नवौँ अन्तरसरकारी क्षेत्रीय सम्मेलनको आज समापन गर्दै उहाँले उक्त कुरा बताउनुभएकोे हो ।

सडक सञ्जाल विस्तार, दिगो आर्थिक विकास तथा सामाजिक एकीकरणका लागि सम्मेलन फलदायी भएको चर्चा गर्दै उपप्रधानमन्त्री गच्छदारले भूकम्पबाट क्षतविक्षत भएका यातायातका पूर्वाधारको पुनर्निर्माणका निम्ति पनि सम्मेलन उपयोगी भएको धारणा राख्नु भयो ।

वातावरणमैत्री यातायातका पूर्वाधार निर्माण गरी मुलुकलाई आधुनिकतातर्फ उन्मुख गराउन जरुरी भएको बताउँदै उहाँले त्यस्ता पूर्वाधार निर्माणलाई सरकारले उच्च प्राथमिकता दिएको स्पष्ट गर्नुभयो । ग्रामीण विकासका साथै जलवायु अनुकूलन कायम गर्दै सहर र नगरको विकासमा सम्मेलनले जोड दिएको उहाँले बताउनुभयो ।

क्षेत्रीय विकासका लागि राष्ट्रसङ्घीय केन्द्रका निर्देशक चिकाको ताकासेले आगामी १५ वर्षका लागि राष्ट्रसङ्घले निर्धारण गरेका दिगो विकासका कार्यसूचीअनुरुप एसियाली मुलुकले पनि सुरक्षित एवम् दिगो यातायात पूर्वाधार निर्माणतर्फ आफूलाई केन्द्रित गर्नुपर्नेमा जोड दिनुभयो ।

इस्क्यापका यातायात नीति तथा विकास शाखाका प्रमुख पिटर ओ नेलले प्राकृतिक विपत्तिको जोखिमका साथै जलवायु परिवर्तनको प्रभावले प्रताडित एसियाली देशहरूले त्यस्ता विपत्तिबाट जोगिने गरी यातायातका पूर्वाधार बनाउनुपर्ने सुझाव दिनुभयो । यातायात सम्पर्कको दिगो विकासका लागि इस्क्यापले सक्दो सहयोग गर्ने प्रतिबद्धता पनि उहाँले व्यक्त गर्नुभयो ।

जापानको वातावरण मन्त्रालयका काउन्सेलर तेरुयोसी हायामिजुले भौतिक पूर्वाधार विकासको पैरवी गर्ने सङ्घसंस्थाले वातावरणीय रुपमा दिगो र सुरक्षित यातायात पूर्वाधार निर्माणका निम्ति प्राविधिक एवम् आर्थिक सहयोग गर्नुपर्ने आवश्यकता औँल्याउनुभयो ।

मञ्चको दसौँ क्षेत्रीय सम्मेलन आगामी वर्ष लाओ जनगणतन्त्रमा आयोजना गर्ने निर्णय पनि सम्मेलनले गरेको छ ।

 

रासस

थप समाचार
प्रतिकृया
नाम

ईमेल

ठेगना