आँखा अस्पतालको शिविरद्धारा सेवा

 

चितवन,  मङ्सिर १ गते  । सबैतिर बिरामीले अस्पताल खोज्दै जानुपर्ने बाध्यता भएका बेला यहाँको भरतपुर आँखा अस्पतालले भने गाउँमै पुगेर बिरामीको उपचार गर्दै आएको छ । चितवनको भरतपुरमा नेपाल नेत्रज्योति सङ्घले सञ्चालन गरेको भरतपुर आँखा अस्पतालले छुट्टै विभाग नै खडा गरेर गाउँगाउँमा शिविरहरुमार्फत बिरामीलाई सेवा दिने अभियानलाई तीव्रता दिएको छ । 

अस्पतालको बाह्य कार्यक्रम संयोजक रमेश घिमिरेका अनुसार गएको आवमा अस्पतालले विभिन्न जिल्लामा ४८ वटा एकदिने शिविर गरेको छ । शल्यक्रियासमेत गर्ने सर्जिकल शिविर १९ वटा भएका छन् । जसबाट तीन हजार ९५७ जना बिरामीको शल्यक्रिया गरिएको घिमिरेले बताउनुभयो । शिविरकै अवधिमा १७ हजार ८५ जनाले आँखा परीक्षणको अवसर पाएका छन् । यस्ता शिविर निःशुल्क गरिने हुँदा पनि ग्रामीण क्षेत्रका बासिन्दा लाभान्वित हुने गरेका छन् ।

अस्पतालले गत वर्षमा ६३ वटा स्कुलका २१ हजार ५५५ विद्यार्थीको आँखा परीक्षण गरी ९६१ वटा चश्मासमेत निःशुल्क वितरण गरेको जनाएको छ ।
यसैगरी विभिन्न विद्यालयका ९० जना शिक्षकलाई तालिमसमेत दिइएको छ । सामान्य जस्तो लागेर अस्पतालसम्म नपुग्ने ग्रामीण क्षेत्रका धेरै बासिन्दाको रोग पहिचान शिविरबाट हुने गरेको घिमिरेको भनाइ छ ।
यस आवमा ४० हजार विद्यार्थीको आँखा परीक्षण गर्ने लक्ष्य अस्पतालले लिएको छ ।
चार सय महिला स्वास्थ्य स्वयम्सेविका र १५० जना शिक्षकलाई तालिम दिने लक्ष्य पनि अस्पतालले राखेको छ । गतवर्ष १८९ जना महिला स्वास्थ्य स्वयम्सेविकालाई तालिम दिइएको थियो ।
यस वर्ष भूकम्प प्रभावितका लागि चारवटा जिल्लामा १६ वटा शिविरमार्फत् आँखाको परीक्षण गराउन लागेको भरतपुर आँखा अस्पताल सञ्चालक समितिका अध्यक्ष चिजकुमार मास्केले बताउनुभयो ।
भूकम्प प्रभावित गोरखा, लम्जुङ, धादिङ र तनहुँमा शिविर गरिँदैछ । पहिचान नभएकाहरुको पनि रोग पत्ता लगाएर गाउँगाउँमा गएर सेवा दिने अभियानका साथ भरतपुर आँखा अस्पताल लागिपरेको उहाँले बताउनुभयो ।
नेपाल नेत्रज्योति सङ्घले यसका अतिरिक्त पर्साको ठोरी, चितवनको माडी, खैरहनी, सौराहा, नवलपरासीको कावासोती र धादिङको शल्यानटारमा उपचार केन्द्रसमेत सञ्चालन गरेर सेवा दिँदै आएको छ । रासस

थप समाचार
प्रतिकृया
नाम

ईमेल

ठेगना