बेलहिया नाकाबाट दुई दिनमा २० ट्याङ्कर इन्धन भित्रिए

भैरहवा, कात्तिक २४ गते । रूपन्देहीको बेलहिया नाका भएर दुई दिनमा २० ट्याङ्कर इन्धन नेपाल भित्रिएको छ ।

नाका पूर्ण रूपमा ठप्प भएको एक हप्तापछि सोमबार राति १० बजेसम्ममा डिजेल बोकेका तीन र पेट्रोल बोकेका दुई वटा ट्याङ्कर नेपाल भित्रिएको इलाका प्रहरी कार्यालय बेलहियाले जनाएको छ ।

त्यस्तै एलपी ग्यासका तीन वटा बुलेट पनि भित्रिएको छ ।

खाद्यान्न बोकेका ६८ र तरकारी तथा फलफूल बोकेका तीन वटा गाडी समेत नेपाल भित्रिएको प्रहरीले जनाएको छ ।

यस अघि आइतबार राति १२ ट्याङ्कर इन्धन बेलहिया नाकाबाट भित्रिएको थियो ।

वीरगञ्ज घटनापछि इन्धन लगायत अन्य सामग्रीको आयात बन्द भएपछि पहिलो पटक आइतबार राति डिजल र पेट्रोलका पाँच÷पाँच र एलपि ग्यासका बुलेट दुई गरी १२ वटा इन्धन ट्याङ्कर भित्रिएका थिए ।

त्यस्तै अक्सिजन ग्यास र कार्बनडाइअक्साईड ग्यासको एक÷एक बुलेट समेत भित्रिएका थिए । दिनभर इन्धन बोकेका गाडी रोकिएपनि राति भने सीमित मात्रामा छाड्ने गरिएको छ ।

दैनिक एक डेढ दर्जन मालबाहक ट्रक भित्रिँदै आएकोमा आइतबार राति एक्कासी केही इन्धन छाडिएपछि नाका केही सहज हुने आशामा रहेको रूपन्देहीका प्रमुख जिल्ला अधिकारी विष्णुप्रसाद ढकालले बताउनुभयो ।

“नियमित रूपमा सीमावर्ती जिल्लाका काउण्टर पार्टसँग समन्वय गरिरहेको अवस्था छ । दिल्लीमा नेपाली राजदूतसँग सम्पर्क गर्दा नाका सहज हुने सङ्केत मिलेको जानकारी पाएको छु” – प्रजिअ ढकालले भन्नुभयो ।

थप समाचार
प्रतिकृया
नाम

ईमेल

ठेगना