लोपोन्मुख विजयसाल संरक्षणमा जुट्न थाले

कञ्चनपुर, कात्तिक १७ गते । कञ्चनपुरको कृष्णपुर नगरपालिका– ५ मा रहेको महाकाली सामुदायिक वन उपभोक्ता समूहले लोपोन्मुख वियजसाल संरक्षण गर्न जुटेको छ । लोपोन्मुख वनस्पति संरक्षण गर्दा वनस्पति विज्ञानका अध्ययनकर्ता, पर्यटक र विजयसाल व्यवसायीलाई वनतर्फ आकर्षित गर्न सकिने भन्दै संरक्षणमा जुटेको सो सामुदायिक वनका अध्यक्ष तुलसीराम चौधरीले बताउनुभयो ।

उहाँका अनुसार सामुदायिक वनले वनजङ्गल संरक्षण सँगसँगै विजयसालको संरक्षण, पुर्नउत्पादन र विस्तारलाई प्राथमिकतामा राखेको छ । विजयसाल संरक्षणका लागि भन्दै सामुदायिक वनले कञ्चनपुरमै पहिलोपटक सामुदायिक वनलाई खुला चरिचरन निषेधित क्षेत्र घोषणा गरेको छ ।

अध्यक्ष चौधरीका अनुसार महाकाली सामुदायिक वनभित्र मात्रै ‘विजयसाल नमुना प्लट’ समेत निर्माण गरिएका छन् । पाँच सय ३० उपभोक्ता घरधुरी रहेको वनका उपभोक्ता मुक्तकमैया, दलित र न्यून आय भएका रहेका छन् ।

सामुदायिक वन समन्वय समिति कञ्चनपुरका अध्यक्ष महेशदत्त जोशीले कञ्चनपुरका विभिन्न सामुदायिक वनमा चालु आवमा १५ हजार विजयसालका बिरुवा वृक्षरोपण गरिएको जानकारी दिनुभयो ।

कञ्चनपुरकै ग्वालावारी सामुदायिक वनले समेत पाँच हजार नयाँ बिरुवा उत्पादन गर्न नर्सरी तयार गरेको छ । सामुदायिक वनमा कार्यालय सचिव दिलीपसिंह भण्डारीले गत वर्ष पाँच हजार बिरुवा रोपेको बताउनुभयो ।

जिल्ला वन कार्यालय कञ्चनपुरका जिल्ला वन अधिकृत सुरेश सिंहले विजयसाल कटानी र ओसारपसार प्रतिबन्धित वनस्पति भएको बताउनुभयो ।

उहाँका अनुसार विजयसालका लागि कञ्चनपुर उपयुक्त भौगोलिक धरातल हो । “जिल्ला वन कार्यालयले समेत विजयसाल संरक्षणका लागि सहयोग गर्ने कार्यक्रम रहेको छ” – उहाँले भन्नुभयो – “नर्सरी व्यवस्थापनमा वन कार्यालयले सहयोग गर्दछ ।”

जिल्ला वन कार्यालयले विजयसाल संरक्षणसम्बन्धी अध्ययनसमेत गर्ने तयारी गरिरहेको सिंहले बताउनुभयो । विजयसाललाई प्राकृतिक र कृत्रिम रुपमा समेत पुर्नउत्पादन गर्न सकिने वन अधिकृत सिंहको भनाइ छ । रासस

थप समाचार
प्रतिकृया
नाम

ईमेल

ठेगना