पश्चिमी वायुको प्रभावले देशका विभिन्न भागमा वर्षा

काठमाडौँ, कात्तिक १२ गते । बुधबार साँझदेखि पश्चिम नेपालका विभिन्न जिल्लासहित देशका विभिन्न भागमा वर्षा भएको छ । मनसुन सकिएपनि पश्चिमी वायुको प्रभावले हिजो रातिदेखि पश्चिम नेपालका केही ठाउँमा वर्षा भएको जल तथा मौसम विभागले जनाएको छ ।

मौसमविज्ञ वरुण पौडेलले मध्य अरब सागरबाट बादल उठेर आएका कारण नेपालका मध्य तथा पूर्वी जिल्लामा पनि वर्षा भएको जानकारी गराउनुभयो ।

वर्षा हुने क्रम पश्चिमबाट पूर्वतर्फ बढेका कारण आज साँझदेखि पश्चिम भागमा वर्षा हुने क्रम बन्द हुँदै भोलि बेलुकासम्म सबै क्षेत्रमा वर्षा रोकिने उहाँको भनाइ छ । पानी परेसँगै काठमाडौँमा बिहीबार बिहानदेखि जाडो बढेको छ ।

हिजो साँझदेखि पश्चिम नेपालका दिपायल, डडेलधुरा, नेपालगञ्ज, जुम्ला, दाङ, पोखरा भैरहवालगायत स्थानका साथै पूर्वी नेपालका काठमाडौँ र यस आसपासका जिल्लामा पानी परेका कारण पाकेको धानखेतीलाई असर पु¥याएको हो ।

पानीका कारण काटेर सुकाउन लागेको धान भिजेको र काट्ने तयारीमा लागिएको धानका लागि पनि असर पारेकोे कृषकहरू बताउँछन् ।

काठमाडौँका अधिकांश स्थानमा धान काट्न बाँकी रहेका कारण धान काट्न एक दुई दिन ढिला हुने भए पनि त्यसको असर धेरै नपरेको दक्षिणकाली कृषि सेवा केन्द्रका प्रमुख रघुनाथ खड्काले बताउनुभयो ।

कृषि विकास अधिकृत रेवतीराज शर्माले पानीले काटेको धानको परालमा सामान्य असर पारे पनि लगातार पानी नपरेमा खासै असर नपर्ने बताउनुभयो ।

काट्ने तयारीमा रहेको धानलाई सामान्य पानीले असर नपार्ने भए पनि हावाहुरीसहित पानी आएमा केही धान झर्नसक्ने उहाँले बताउनुभयो । रासस

थप समाचार
प्रतिकृया
नाम

ईमेल

ठेगना