प्रधानमन्त्रीबाट महामन्त्री गुरुङको पार्थिव शरीरमा श्रद्धाञ्जलि

 

 

काठमाडौँ, असोज २६ गते। प्रधानमन्त्री केपी शर्मा ओलीले राष्ट्रिय प्रजातन्त्र पार्टी नेपालका महामन्त्री चन्द्रबहादुर गुरुङको gurungपार्थिव शरीरमा आज श्रद्धाञ्जलि दिनुभएको छ ।

प्रधानमन्त्री ओलीले धुम्रबाराहीस्थित राप्रपा नेपालको कार्यालयमा पुगेर गुरुङलाई श्रद्धाञ्जलि दिँदै उहाँ मिलनसार स्वभाव र राष्ट्रवादी चिन्तक भएको र उहाँको निधनबाट मुलुकले एक राष्ट्रवादी नेता गुमाएकामा दुःख व्यक्त गर्नुभयो ।

एनेकपा माओवादीका अध्यक्ष पुष्पकमल दाहालले गुरुङलाई श्रद्धाञ्जलि दिँदै देशमा सङ्कट आएका बेला उहाँले समाधानका लागि सबै दललाई एकताबद्ध हुन समन्वय गर्ने र देश तथा जनताको पक्षमा कार्य गर्न प्रतिबद्ध नेताका रुपमा स्मरण गर्नुभयो ।

राप्रपा नेपालका अध्यक्ष एवम् उपप्रधानमन्त्री कमल थापाले गुरुङ नेपाली राजनीतिमा परिपक्व अभिभावक र निष्ठावान राजनीतिज्ञ रहेको विचार व्यक्त गर्दै उहाँको निधनले आदर्शवान नेता मुलुकले गुमाएको बताउनुभयो ।

पूर्व प्रधानमन्त्री लोकेन्द्रबहादुर चन्द, माधवकुमार नेपाल, डा बाबुराम भट्टराई, उपप्रधानमन्त्री विजयकुमार गच्छदार तथा नेपाली काँग्रेसका उपसभापति रामचन्द्र पौडेल, उपसभामुख ओनसरी घर्ती, राप्रपाका नेता डा प्रकाशचन्द्र लोहनीलगायत नेता श्रद्धाञ्जलि दिन त्यहाँ पुग्नुभएको थियो ।

यही असोज १६ गते राति उपचारका क्रममा अमेरिकाको कोलोराडोमा निधन भएकामा आज दिउँसो त्रिभुवन अन्तर्राष्ट्रिय विमानस्थलमा उहाँको शव ल्याइएको हो । उहाँको शव स्वदेश ल्याउन लामो कूटनीतिक प्रक्रिया पूरा गर्नु परेकाले ढिलाइ हुन गएको पार्टीका सहायक महामन्त्री राजाराम श्रेष्ठले जानकारी दिनुभयो ।

विमानस्थलमा उहाँको शव लिनका लागि पार्टीका अध्यक्ष एवम् उपप्रधानमन्त्री कमल थापा तथा पार्टीका पदाधिकारी, नेतागण, कार्यकर्ता र आफन्तजन पुग्नुभएको थियो ।

पार्टीका संस्थापक नेता, महामन्त्री, पूर्व संसदीय दलका नेता गुरुङको पार्थिव शरीरलाई विमानस्थलबाट शवयात्रा गरिएको थियो । रासस

थप समाचार
प्रतिकृया
नाम

ईमेल

ठेगना