मादल बनाउन भ्याइनभ्याइ

madal 


जाजरकोट, असोज १३ गते। वरिपरि मादलको लहर, छेउमा मादलको मुखमा गोटी भरिरहेकी श्रीमतीका साथमा खलङ्गा–९ रावतगाउँका तिले वादीलाई यतिबेला मादल बनाउन भ्याइनभ्याइ छ ।

केहि वर्ष अघिसम्म गाउँका अन्य वादी समुदायले मादल बनाउने पेसा गर्ने गरेपनि अहिले उहाँको परिवारले मात्र उक्त पेसा अँगालिरहेको छ ।

पाश्चात्य सङ्गीत मोहका कारण गाउँमा मादल बजाउने र किन्ने चलन हराउँदै गए पनि यो पेसा जोगाउन वादी व्यावसायिक रुपमा लागि पर्नुभएको छ ।

व्यावसायिक रुपमा मादल बनाउने पेसामा कोही पनि नलागिरहेको बेला रोजी रोटीको लागि मात्र नभएर मादल जोगाउने सुरका साथ आफूले यो पेसालाई निरन्तरता दिएको उहाँले बताउनुभयो ।

अन्य वादी समुदायले मादल बनाउन छोडेपनि आफूले नछोड्ने र पछाडिका पुस्तालाई यो कला र सीप हस्तान्तरण गर्न चाहेको तिलेको भनाइ छ । नयाँ मादल बनाउने र पुराना मादलको मर्मत गर्ने गरेका उनीहरुसँग मादल किन्न जिल्लाभित्र र बाहिरबाट समेत मानिसहरु आउने गरेका छन् । सात छोरीका बुबा तीले मादल बनाएर यथेष्ट आम्दानी हुने बताउनुहुन्छ ।

तिलेकी श्रीमती सन्तोषीका अनुसार नयाँ मादलको मूल्य रु एक हजार ५०० देखि रु पाँच हजारसम्म पर्छ । मर्मत गर्दा रु एक हजार र गोटी हालेको रु ५०० लिने गरिएको छ । अहिले तिलेलाई मादल बनाउन भ्याइनभ्याइ छ ।

वादी दम्पतीले घरेलु प्रविधिबाटै बनाएका मादल बिक्री गरेर एक याममा रु ३० देखि रु ४० हजारसम्म आम्दानी गर्ने गरेका छन् । मादल बनाउने पेसालाई व्यावसायिक बनाउन आधुनिक औजार र नवीनतम् प्रविधिको खाँचो रहेको उनीहरुको भनाइ छ ।

वादी समुदायको पहिचानका रुपमा रहेको मादल बनाउने पेसालाई संरक्षण र प्रवद्र्धनका लागि स्थानीय निकायले सहयोग गर्नुपर्ने नागरिक अगुवा सहदेव बस्नेतले बताउनुभयो । जिविसले स्थानीय पञ्चेबाजा संरक्षणका लागि बर्सेनि बजेट विनियोजन गर्ने गरेपनि मादल संरक्षणका लागि भने कुनै सहयोग नगरेका स्थानीयबासीको गुनासो छ । रासस


 

थप समाचार
प्रतिकृया
नाम

ईमेल

ठेगना