प्रेसलाई पूर्ण रूपले स्वतन्त्र बनाउन माग

काठमाडौँ, भदौ ७ गते । संविधानसभाका अध्यक्ष सुवास नेम्वाङसँग मिडिया सोसाइटीका प्रतिनिधि र उद्योग व्यवसायीहरूले अब बन्ने संविधानमा प्रेसलाई पूर्ण रूपले स्वतन्त्र बनाउन र उद्योग व्यवसाय सुचारु रूपले सञ्चालन गर्नसक्ने वातावरण बनाउन माग गरेका छन् ।

नयाँ वानेश्वस्थित संविधानसभा भवनमा अध्यक्ष नेम्वाङसँग मिडिया सोसाइटी नेपालका अध्यक्ष कैलाश सिरोहिया तथा महासचिव शुभशङ्कर कँडेलले दश बुँदे ज्ञापनपत्र बुझाउँदै संविधानको धारा २२ र २४ मा उल्लिखित व्यवस्थाले विचार अभिव्यक्तिको स्वतन्त्रता कुण्ठित गर्ने, सञ्चारमाध्यममा प्रतिबन्ध लगाउनसक्ने व्यवस्था प्रेस स्वतन्त्रता विपरीत हुने भएकाले संशोधन गर्न माग गरेका हुन् ।

यसैगरी श्रम तथा रोजगारसम्बन्धी नीतिमा व्यवस्थापनमा श्रमिकको सहभागिता सुनिश्चित गर्ने प्रावधानले लगानीको वातावरण भाँडिने भएकाले श्रमिकलाई राज्यले सेवा सुविधा दिने कुरा संविधानमा उल्लेख नगर्न पनि ध्यानाकर्षण गराएका छन् ।

यसैगरी नेपाल उद्योग परिसङ्घ, नेपाल उद्योग वाणिज्य सङ्घ, चेम्बर अफ कमर्श र नेपाल होटल सङ्घका तर्फबाट पशुपति मुरारका र राजेशकाजी श्रेष्ठलगायतका प्रतिनिधिले देश सङ्घीयतामा गएपनि केन्द्र तथा प्रदेशमा दोहोरो कर बुझाउनुपर्ने व्यवस्था हटाउन, सम्पत्तिको राष्ट्रियकरण नगर्न, प्राकृतिक स्रोतको उपयोगमा निजी क्षेत्रले लगानी गर्न सक्ने वातावरण मिलाउन, उद्योग व्यवसायमा विदेशी लगानी आकर्षित गर्ने वातावरण मिलाउन र बढीभन्दा बढी पर्यटकलाई नेपाल घुम्न आउने वातावरण सहज गराउन माग गरेका थिए । रासस

थप समाचार
प्रतिकृया
नाम

ईमेल

ठेगना