स्वतन्त्र प्रेसले मात्र प्रजातन्त्रको रक्षा गर्न सक्ने

ललितपुर, साउन १६ गते । उपप्रधानमन्त्री प्रकाशमान सिंहले स्वतन्त्र प्रेस जगतले मात्र प्रजातन्त्रको रक्षा गर्न सक्ने बताउनुभएको छ ।

नेपाल प्रेस युनियन ललितपुरको वार्षिक साधारणसभामा बोल्दै उहाँले आगामी संविधानमा पूर्ण प्रेस स्वतन्त्रताको सुनिश्चित गरिने बताउनुभयो ।

उहाँले स्थानीय रुपमा क्रियाशील पत्रकारको नेतृत्वले मात्र प्रेस जगतलाई मजबुतरुपमा अगाडि बढाउन सक्नेमा विश्वास गर्दै प्रजातान्त्रिक आन्दोलन सफलताको पछाडि प्रेसको भूमिका उल्लेखनीय रहेकामा प्रशंसा गर्नुभयो ।

उहाँले सोह्रबुँदे सहमतिपछि संविधान लेखन प्रक्रियाले गति लिएको सन्दर्भलाई जोड्दै यसलाई मूर्त रुप दिन अझै बाँकी रहेको बताउनुभयो ।

संविधानसभामा नेपाली काँग्रेस ठूलो राजनीतिक दल भएता पनि संविधान जारी गर्न दुई÷तिहाई आवश्यक भएकाले सबै दलहरुसँग सहमति र सहकार्य गरिनुपर्ने उहाँको भनाइ थियो ।

नेपाली काँग्रेस ललितपुरका सभापति एवम् सभासद् मदनबहादुर अमात्यले प्रेस स्वतन्त्रताले मात्र प्रजातन्त्र जोगिने बताउनुभयो ।

प्रेस युनियनका महासचिव अजयबाबु सिवाकोटीले पत्रकारले समाचार लेखेकै निहुँमा सञ्चारगृहबाट निष्कासित हुनुपर्ने र कारबाही भोग्नुपर्ने अवस्थाले स्वतन्त्र प्रेसको खिल्ली उडाएको छ भन्नुुभयो ।

राष्ट्रिय समाचार समितिका अध्यक्ष कुलचन्द्र वाग्लेले प्रेस स्वतन्त्रताले मात्र नागरिकको अधिकार सुनिश्चित हुन सक्ने उल्लेख गर्दै स्पष्ट मापदण्ड र लक्ष्य लिएर प्रेस युनियन अघि बढ्नुपर्नेमा जोड दिनुभयो ।

संविधानमा जनताको सुझाव समेट्नुपर्नेमा जोड

‘नेपालको संविधान, २०७२ प्रारम्भिक मस्यौदा’मा जनताले दिएका सुझावलाई संविधानमा समेटिनुपर्नेमा सरोकारवालाले जोड दिइएका छन् ।

प्रजातान्त्रिक विचार समाजद्वारा आज यहाँ आयोजित ‘संविधानको मस्यौदा र समसामयिक विषय’ अन्र्तक्रियामा उनीहरुले जनताले दिएका सुझावलाई संविधानमा लिपीबद्ध गरिनुपर्ने बताए ।

नेपाली काँग्रेसका सभासद् बद्री पाण्डेले संविधान जारी गर्नुपूर्व सीमाङ्कनको टुङ्गो लगाएर नामाङ्कनको जिम्मेवारी प्रदेशलाई दिनुपर्ने बताउनुभयो ।

सभासद् मीन विश्वकर्माले जनताले दिएका सुझावलाई संविधानमा लेखिनुपर्नेमा जोड दिनुभयो ।

कार्यक्रममा काँग्रेस नेता जगदीशनरसिंह केसी, राष्ट्रिय समाचार समितिका अध्यक्ष कुलचन्द्र वाग्ले, नास्टका उपकुलपति डा जीवराज पोखरेल, अधिवक्ता शेरबहादुर केसीलगायतले संविधानको मस्यौदा बारेमा बोल्नुभएको थियो । रासस

थप समाचार
प्रतिकृया
नाम

ईमेल

ठेगना