घट्यो जडीबुटीको निर्यात

jadibutiAबाँके, साउन १५ गते । निर्यातका क्रममा आएका अनेक झन्झटले भारततिर हुँदै आएको जडीबुटी निर्यातमा कमी आएको छ । गत आर्थिक वर्ष २०७१/ ७२ मा नेपालगञ्ज नाका भएर ४६ लाख नौ हजार किलो जडीबुटी भारत निकासी भएको छ । अघिल्लो आवमा भन्दा कम जडीबुटी भारत निकासी भएको हो । नेपालगञ्ज नाका हुँदै भारत तर्फ हुने जडीबुटीको निकासी बर्सेनि घट्दैगएको छ । आव २०७०/७१ मा ४७ लाख ३५ हजार किलो जडीबुटी नेपालगञ्ज हुँदै भारत निकासी भएको नेपाल जडीबुटी व्यवसायी सङ्घ केन्द्रीय कार्यालय नेपालगञ्जले जनाएको छ । नेपालगञ्ज नाका हुँदै बर्सेनि करिब एक अर्ब रुपिया“ बराबरको जडीबुटी भारत निकासी हुने गरेको सङ्घले जनाएको छ । भारतको उत्तरप्रदेश राज्य सरकारले जडीबुटी निकासीमा ‘ट्रान्जिट पास’ लिनुपर्ने व्यवस्था लागू गरेपछि नेपालगँज हुँदै भारतमा जडीबुटी निकासी बर्सेनि घट्दै गएको सङ्घका अध्यक्ष मोहम्मद याकुब अन्सारीले जानकारी दिनुभयो । ट्रान्जिट पासको अनिवार्य व्यवस्था गरिएपछि पछिल्लो चार वर्षदेखि नेपालगञ्जबाट भारततर्फ जडीबुटीको निकासी घट्दोक्रममा छ, अध्यक्ष अन्सारीले भन्नुभयो, राजनीतिक दलका नेतादेखि प्रधानमन्त्री सम्मको ध्यानाकर्षण गराए पनि समस्याको समाधान हुन सकेको छैन । ट्रान्जिट पासका लागि नेपालगञ्ज नाका भएर जडीबुटी भारत पठाउँदा चार दिनसम्म सीमाक्षेत्रमा मालबाहक सवारी साधन रोक्दा थप व्ययभार व्यहोर्नु पर्ने व्यवसायीले जनाएका छन् । पछिल्लो समय भैरहवा लगायतका नाकाबाट समेत जडीबुटी निकासी हुन थालेको छ । चार वर्षदेखि जडीबुटी निकासीमा देखिएको समस्या समाधान हुन नसकेका कारण निकासीमा कमी आएको र व्यवसायी मारमा परेको सङ्घले जनाएको छ । भारतमा जडीबुटी निकासीमा समस्या भोग्दै आएको व्यवसायीले नेपालमासमेत दोहोरो कर तिर्नुपर्दा समस्या भएको दाबी गरेका छन् । अध्यक्ष अन्सारीका अनुसार, जडीबुटीमा वन कार्यालय, जिल्ला विकास समिति, र भन्सार कार्यालयले छुट्टा छुट्टै कर लिने गरेका छन् । यसैगरी चेकजाँचको नाममा वन कार्यालय तथा प्रहरीका चेक पोस्टहरूले सताउने गरेको अन्सारीको दाबी छ । सङ्घका अनुसार मध्यपश्चिमका डोल्पा, जुम्ला, हुम्ला, सल्यान, रोल्पा, जाजरकोट, रुकुम, प्यूठान, दाङ, सुर्खेत लगयातका जिल्लामा बर्सेनि ठूलो परिमाणमा जडीबुटी सङ्कलन हुने गरेको छ । सो जडीबुटी नेपालगञ्जसम्म ल्याएर भारत तथा अन्य मुलुकमा निकासी गर्ने गरिएको छ । जडीबुटी ओसारपसार तथा खेतीमा स्पष्ट नीति नभएका कारण व्यवसायीसँगै जडिबुटी सङ्कलनको काम गर्ने किसानले समेत पर्याप्त लाभ लिन सकेका छैनन् । नेपालगञ्ज नाका भएर टिमुर, सतावरी, रिठ्ठा, पाखनबेद, अमला, गुजरगानो, सिकाकाई, काउलो बोक्रा, झ्याउ, तेजपात, हलहलेजरा, विषजरा, दालचिनी, सालमदाना जटामसी जस्ता बहुउपयोगी जडीबुटी ठूलो परिमाणमा भारत निकासी हुने गरेको कार्यालयले जनाएको छ । यसैगरी, भुतकेश, मजिठा, बोझो, काउलो बोक्रा, अकरकरा, चुत्रो बोक्रा, निरमसी, पिपला, लोहान, अतिस, कुकुरडाइनो, गिठिदार बोक्रा, नागबेली पाउडर, तिगेडी, सेतकचिनी, गोकुलधुप, वन सुडो बोक्रा, गुड्ची, सुगन्धवाल मार्क, सुगन्ध कोकिला मार्क, सुगन्ध कोकिला तेल लगायत जडीबुटी भारत निकासी हुँदैआएको छ ।

थप समाचार
प्रतिकृया
नाम

ईमेल

ठेगना