मिति नजिकिंदै , काङ्ग्रेस महाधिवेशन तयारी सुस्त

kangrsh
काठमाडौं, साउन १३ गते । नेपाली काँग्रेसको १३ औँ महाधिवेशन मिति नजिकिए पनि आवश्यक तयारीले अझै गति लिन सकेको छैन । पार्टीको गाउँ, नगर र जिल्ला अधिवेशन हुन अव तीन साताभन्दा कम समय वाँकी छ तर अझै केन्द्रीय समितिले पार्टीका क्रियाशील सदस्यताको विवाद किनारा लगाउन सकेको छैन ।
त्यति मात्र होइन पार्टीको केन्द्रीय समिति बैठक बस्ने साइत अझै जुरेको छैन । केन्द्रीय समिति बैठक नबस्दा महाधिवेशनमा प्रस्तुत हुने पार्टीको नीति तथा कार्यक्रम, विधान संशोधन, निर्वाचनको तयारीलगायतका प्रक्रिया अघि बढ्न सकेको छैन । विगतको महाधिवेशनमा नीति तथा कार्यक्रम, विधान संशोधनलगायतका विषयमा समय छँदै काम सुरू गर्ने गरिए पनि यस पटकको महाधिवेशनमा ती विषयमा बिलम्व भएको नेताहरू नै स्वीकार गर्दछन् ।
पार्टीका शीर्ष नेताहरूको आन्तरिक छलफलपछि चार÷पाँच दिनभित्र पार्टी केन्द्रीय समिति बैठक बस्ने सहमति भएको बुझिएको छ । पार्टीका सहमहामन्त्री पूर्णबहादुर खड्का ‘पार्टी महाधिवेशनको खासै नयाँ कुरा केही भएको छैन छिट्टै केन्द्रीय समितिको बैठक बस्ने कुरा भएको छ त्यसपछि मात्र महाधिवेशन प्रक्रिया अघि बढ्छ’ भन्नुहुन्छ । केन्द्रीय कार्यालयले पनि केन्द्रीय समितिको बैठक केही दिनभित्रै बस्ने संकेत गरेको छ । पार्टीमुख्य सचिव ऋषिकेश तिवारीले केही दिनभित्रै केन्द्रीय समितिको बैठक बस्ने जानकारी दिनुभयो ।
पार्टीका बरिष्ठ नेता शेरबहादुर देउवा पाँच दिने भारत भ्रमणका क्रममा बुधवार त्यसतर्फ प्रस्थान गरेकोले उहाँ फर्केपछि मात्र बैठक बस्ने सम्भावना औल्याइएको छ । पार्टीका प्रवक्ता दिलेन्द्रप्रसाद बडू लगायतका केही नेता पनि विभिन्न जिल्लामा रहनुभएको जनाइएको छ ।
केन्द्रीय कार्यसमितिले क्रियाशील सदस्यताको सबै निर्णय टुङ्गो लगाउन नसक्दा सदस्यता फाराम जिल्ला पुग्न सकेको छैन । जिल्लामा क्रियाशील सदस्यता फाराम पुगेपछि हरेक जिल्ला र नगर र गाउँमा ती फाराम वितरण गर्ने, तल्लो तहमा पनि निर्वाचन प्रमुख र सदस्यको नियुक्ति गर्ने र निर्वाचन गराइने परम्परा छ । तर हालसम्म ती कुनै पनि काम हुन सकेको छैन । जिल्लामा यस खाले काम गर्न ढिला भयो भन्ने गुनासो केन्द्रीय कार्यालयमा गरिएको छ तर केन्द्रले यस विषयमा ठोस सम्वोधन गर्न सकेको छैन । ‘अन्तिम समयमा दिनरात काम गर्ने परम्परा काँग्रेसमा छ यस पटक पनि त्यही शैलीमा नै काम हुने सम्भावना छ’ मुख्यसचिव तिवारीले बताउनुभयो । केन्द्रीय समितिले आवश्यक निर्णय गरेपछि रातभरि बसेर काम गछौँ महाधिवेशन तयारीमा कुनै कसर वाँकी रहदैन उहाँले बताउनुभयो ।
पार्टीले क्रियाशील सदस्यताको बारेमा गत फागुन महिनाबाट सुरू गरेको छानविन प्रक्रियाले अझै पूर्णता पाउन सकेको छैन । हालसम्म ७२ जिल्लाको सदस्यताको छानविन पूरा भएको र साउन १५ भित्र सबै काम पूरा हुने जानकारी मुख्यसचिव तिवारीले दिनुभयो ।
नेपाली काँग्रेस उपसभापति रामचन्द्र पौडेलले महाधिवेशनमा जति तयारी हुनुपर्ने हो सो अनुसार हुन नसकेको स्वीकार गर्दै छिट्टै नै यसले गति लिने विश्वास व्यक्त गर्नुभयो । ‘ केन्द्रीय समितिको बैठकका लागि साथीहरूले नेतृृत्वको ध्यानकर्षण गराउनुभएको छ छिट्टै नै बैठक बस्ला’ नेता पौडेलले बताउनुभयो ।
नेकाको गाउँ र नगर अधिवेशन भदौँ १ मा, क्षेत्रीय अधिवेशन भदौँ ७ मा, जिल्ला अधिवेशन भदौँ १० मा र केन्द्रीय महाधिवेशन असोज १ देखि ५ सम्म गर्ने तय भइसकेको छ । महाअधिवेशन काठमाडौँमा गर्ने निर्णय काँग्रेसले यस अघि नै गरिसकेको छ ।



थप समाचार
प्रतिकृया
नाम

ईमेल

ठेगना